Zenbat balio du europar goi bilera batek? Gutxienez 10 milioi

Zenbat balio dute krisiaren hasieratik eta hurrengo ostegunetik ostiralera estatuburu eta Gobernuburuek egingo dituzten europar goi-bilerek? Gutxienez 10 milioi euro. Hori ordaintzeko, Estatuetako edota Europar Erkidegoko aurrekontuetatik hartuko dute dirua. Gastu hauek izugarri igo daitezke aurrerantzean, Frantziako presidente Sarkozyk nahi duen bezala, krisia bukatu bitartean hilero biltzen badira. 

Europar Batasuneko iturrien arabera, Europako Kontseilurako gastu estra, pertsonal gehigarria (finkoa erakundeko aurrekontuen barnean baitago), komunikazioak, bilerako partaide guztientzako doako ostalaritza zerbitzua eta bertako barne segurtasunerako eta estatuburuen segurtasunerako aurrekontua 500.000 euro ingurukoa da.

Segurtasun neurri horietako batzuk Schuman metroko geltokia eta bilerak hartzen dituen eraikinaren inguruko errepideak ixtea eta goi-agintariak batetik bestera eramateko operazio berezia dira.

8 milioi baino pixkat gehiago

Belgikako Barne Ministerioak azaldu duenez, bilera hauen inguruko azken datuak 2007ko aurrekontuetan azaltzen dira, urte horretan hiru goi bilera burutu baitziren Bruselan. Guztira, urte horretako gastu totala 25 milioikoa izan zen, hau da, 8 milioi baino pixkat gehiago bilera bakoitzeko.

Horrelako bileretan, beste diru kopuru garrantzitsu bat herrialde bakoitzeko delegazioek xahutzen dute, bertan, Estatu bakoitzeko buruzagiaz gain, gai teknikoetan laguntzen dieten idazkariek, laguntzaileek, protokolo adituek eta eskoltek ere parte hartzen baitute.

Hedabideek ere pertsonal gehigarria bidali behar izaten dute bilera ospatzen den lekura, eta ehunka  zuzeneko emanaldi egiten dituzte. Hori lortzeko sateliteak alokatu behar dituzte, eta 10 minuturako alokairu batek, batez beste, 250 euro balio du.