Berlusconi 'sutan', Ruby auziaren gaineko telebista saio bategatik

Silvio Berlusconi Italiako lehen ministroak haserre bizian deitu zuen bart Ruby auzia mintzagai zuen La 7 telebista kate pribatuko saio batera. Rubyk agintariaren jaietan parte hartzen omen zuen adingabea zenean.

Berlusconik "L'Infidele" ("Desleiala") saioan zuzenean parte hartu zuen gonbidatuek eta aurkezleak esandakoei erantzuteko. La 7 bere esku ez dagoen telebista kateetako bat da.

"Era zitalean, nazkagarrian gidatutako programa gozakaitz bat ikusten nabil", adierazi zuen Il Cavalierek haserre bizian. Italiako telebista kate guztiek atzo jazotakoa eman dute.

Saioaren aurkezlea egoera baretzen saiatu zen: "Nahikoa iraindu duzu, zergatik ez zoaz epaitegietara, irainak bota beharrean? (...) Nire Gobernuko presidentea zaren heinean, hitz egiteko formak neurtzeko eskatzen dizut", esan zion.

Berlusconi ez zen lasaitu eta ordura arte entzundakoa "faltsua eta desitxuratuta, eta errealitatearekin zerikusirik" ez zuela azpimarratu zuen. Adingabeak ustez prostituitzera bultzatzeagatik eta kargua bereonurako erabiltzeagatik Milaneko Fiskaltzak abiatutako ikerketa ardatz zuen telebista saioak.

Atzo, astelehenean, lehen ministroaren abokatuek defentsa alegatua aurkeztu zuten. Berlusconiren kontrako salaketak ukatzen dituzten 20 pertsona ingururen testigantzak jaso dituzte dokumentu horretan.