Sute batek Brasilgo Museo Nazionala suntsitu du

Suak Brasilgo Museo Nazionala kiskali du. Aurten 200 urte betetzen dituen museoan, 20 milioi pieza inguru daude gordeta, tartean, Egiptoko momiak. Museoko ateak itxita zeudela piztu da sua, eta ez da inor zauritu, baina kalte material handiak eragin ditu.

Oraindik argitzeke dago zerk eragin duen sua.

Sutearen berri izandakoan bertaratu den Jose Perez Pombal Museo Nazionaleko zuzendari ohiak EFE albiste-agentziari esandakoaren arabera, "ez da ezer geratuko". "Garrek altuera handia harrapatu dute, sua toki guztietan dago. Jauregia osorik erreko da, eta baita bertan dagoen guztia ere: bildumak, momiak eta abar. Amaitu da. Ez dakit honen ondotik erakundeak jarraituko duen ala ez", adierazi du.

Luis Fernando Duarte erakundeko zuzendariordeak salatu duenez, botere publikoaren "babes eta kontzientzia faltaren ondorio" izan da sutea. Horren esanetan, "urteak daramatzagu gaur suntsitutakoa egoki babesteko baliabideak eskatzen Gobernuari".

Bestalde, Michel Temer Brasilgo presidenteak gertaturikoa deitoratu du, eta herrialdeko museologiarentzat "zorigaiztoko eguna" dela gaineratu. Horren hitzetan, "kalkulaezina" da galera; izan ere, "200 urteko lana, ikerketa eta ezagutza galdu dira". "Egun tristea da brasildar guztientzat", azpimarratu du.