Parte-hartze txikia izan da Tunisiako udal hauteskundeetan

Tunisiako udal hauteskundeetan abstentzioa handia izan da, batez ere, nekazaritza eremuetan, besteak beste, herritarrek politikariengan duten konfiantzarik eza dela eta. 2011n Zinedin Ben Aliren diktadura luzeari amaiera jarri zion trantsizio politikoari bukaera eman diote igande honetako hauteskundeek.

Behin-behineko zenbaketaren arabera, hauteskundeetan % 33,7ko parte-hartzea izan da, eta alde handia izan da, batetik, Tunisen eta Sfaxen (hirigune handienak) jasotako botoen eta, bestetik, nekazaritza eremuetan jasotakoen artean.

Hauteskundeetarako Goi Agintaritza Independenteak hedabideei jakinarazi dienez, hauteskunde historiko hauetara 5 milioi tunisiar baino gehiago zeuden deituta, eta 1.796.154 boto jaso dituzte.

Bestalde, hainbat arazo eta liskar izan dira, esaterako bozkalekuak zabaltzerako orduan; baina, orokorrean, hauteskundeak normaltasunez igaro dira.

Irabazleen harira, garaipena Ennhada islamista kontserbadoreei (Parlamentuko indar nagusia eta Gobernuko kideak) eman diote; hala ere, behin-behineko kalkuluetan ez dituzte zerrenda independentisten emaitzak kontuan hartu, horiek izango bailirateke benetako garaileak.