Ostiralean Israelek tirokatu zuen beste palestinar bat hil da

Aurreko ostiralean Gazako Zerrendako protesten harira zauritu zuten 29 urteko gazte bat hil da gaur, astelehena, Zerrendako Osasun Ministerioak zabaldu duenez. Israelgo soldaduek tirokatu eta larri zauritu zuten.

Honekin, 18 dira jada soldadu israeldarrek Itzulerako Martxa Handian hildako palestinarrak. Israelek horien bi hilotz atxikita mantentzen ditu oraindik.

Gazteak Fares Al Regeb zuen izena, eta sabelean zauritu zuten Jan Yunesen, azaldu du Ashraf al Qedra Gazako Osasun Ministerioaren bozeramaleak.

Milaka eta milaka palestinarrek parte hartu zuten ostiralean, Itzulerako Martxa Handian, Lurraren Eguna omentzeko ekitaldian eta, Israelgo Armadaren arabera, manifestariek sua eragiteko lehergailuak eta pneumatikoak jaurti zizkieten soldaduei, orduan, horiek benetako munizioarekin, kautxu bala eta gas negar-eragileekin erantzun zieten.

1.400 manifestari zauritu zituzten, horietako 35 benetako munizioarekin, Osasun Ministerioaren arabera.