Mundua -
Sarraskia
Gutxienez 160 hildako Yemenen, hileta batean izandako bonbardaketan
Itxura denez, Saudi Arabiak gidatzen duen nazioarteko koalizioko hegazkinek egin dute bonbardaketa.
Agentziak | Erredakzioa
Gutxienez 160 lagun hil dira Yemengo hiriburuan (Sana), horien artean bere burua Gobernu gisa aldarrikatutako hutien hainbat goi kargu, hileta baten aurka izandako bonbardaketa baten eraginez. Dirudienez, bonbardaketaren egileak Saudi Arabiak gidatzen duen nazioarteko koalizioko hegazkinak izan dira, Xinhua agentzia txinatarrak jasotako lekukoen adierazpenen arabera.
Huti Gobernu erreboltariko Osasun ministroak (Tamim Al Shami) jakinarazi duenez, bonbardaketaren ondorioz izan diren hasiera bateko biktima kopurua 450ekoa da (hildakoak eta zaurituak zenbatuta).
Gutxienez bi bonbak jo dute ehunka lagun bilduta zeuden zeremonia areto baten aurka. Hileta Jalal al Ruwaishan Barne ministro hutiaren aitari azken agurra emateko zen. Hutiek kontrolpean dituzte hiriburua eta herrialdeko beste hainbat gune.
Koalizio arabiarrak ukatu egin du
Saudi Arabiak gidatzen duen koalizioak ukatu egin du Yemengo hiriburuko inongo jomugarik bonbardatu izana.
Al Arabiya telebista saudiarabiarrak koalizioaren ohar labur bat plazaratu du, eta bertan jasotzen denaren arabera, koalizioak ezeztatu egin du gaur "Sana gainean hegaz egin izana"