Bonba-auto batek hiru pertsona hil eta 170 zauritu ditu Turkian

Bonba-auto batek eztanda egin du ostegun honetan, abuztuak 18, Turkiako hego-ekialdeko Elazig hiriko polizia-etxe batetik gertu, eta hiru pertsona hil eta ehunka zauritu dira, bertako hedabideek zabaldu dutenez. Ordu batzuk lehenago, beste leherketa bat izan da Turkia ekialdeko Van hirian; hiru pertsona hil dira bertan.

Turkiako segurtasun-indarretako iturrien arabera, polizia-etxetik gertu aparkatuta zegoen bonba-autoak 06:20an egin du eztanda. Hiru polizia hil eta ehun pertsona inguru zauritu dira; horietako hamar, larri. Era berean, leherketa horren ondorioz, lau solairuko eraikina erabat suntsituta geratu da.

Gobernuak PKK alderdi kurduko militanteei leporatu die erasoa, azken hilabeteotan bonba-auto ugari jarri baitituzte Turkiako hego-ekialdean dauden polizia-etxeen inguruetan.

Gainera, atzo, gauean, antzeko beste eraso bat jazo zen Van hiriko beste polizia etxe batean. Bi herritar eta polizia bat hil dira leherketa horren ondorioz.