Mundua -
Alarma faltsua
Times Square hustu dute pakete susmagarri bat aurkitu ostean
Alarma faltsua izan dela baieztatu du New Yorkeko Poliziak, izan ere, ur botilak zituen hozkailu txiki batek eragin du.
Erredakzioa
Aste bakar batean bigarren aldiz, Times Square partzialki hustu behar izan du New Yorkeko Poliziak, Brodway eta 45 kaletik gertu pakete susmagarri bat aurkitu ostean, Poliziaren iturriek aipatuz CNNk jakitera eman duenez.
Oinezko zein ibilgailuentzako 44 eta 47 kaleen arteko zona itxi du New Yorkeko Poliziak, Zazpigarren Etorbidea eta Brodway barne. Gutxi geroago alarma faltsua izan dela baieztatu du Poliziak, izan ere, ur botilak zituen hozkailu txiki batek eragin du. Hozkailua hotel baten atean aurkitu dute Times Squaren.
Iragan larunbatean Times Square itxi behar izan zuten ibilgailu batetik kea ateratzen zela ikusi eta gero. Ondoren autoan lehergailu bat zegoela egiaztatu zuten.
Ordutik segurtasun indarrek lagun bat atxilotu dute, Faisal Shahzad. Pakistaneko jatorria duen AEBetako bizilagunak bakarka ekin zuela aitortu du, baina talde islamiar baten laguntza izan duela uste dute AEBetako eta Pakistaneko agintariek.