9 migratzaile hil dira eta ehunka erreskatatu dituzte Creta inguruan

Greziako kosta zaindariak bederatzi gorpu berreskuratu ditu, eta, momentuz, 350 errefuxiatu salbatu ditu. Gertaera Cretatik 75 itsas milia hegoaldera jazo da, eta erreskate lanekin diraute oraindik ere.

Antza denez, 25 metro luze den itsasontzi bat noraezean ibili da, Alexandriatik irten ostean (Egipto). Tokiko prentsaren arabera, bertan 600-700 migratzaile artean zihoazen.

Une hauetan, bi kostazain eta bost itsasontzi ari dira erreskate lanean. Halaber, Greziak helikoptero bat eta hegazkin bat bidali ditu bertara. Agintariek esan dutenez, meteorologiak lagundu egiten du erreskatean.

Europar Batasuneko eta Turkiaren arteko hitzarmenak ez du errefuxiatuen ihesaldia eten, eta, azken 24 orduetan, 152 pertsona heldu dira Greziara.