Zazpi lagun atxilotu dituzte Indian suitzar bat bortxatzea egotzita

Indiako Poliziak zazpi lagun atxilotu ditu iparraldean suitzar emakumezko bat ustez bortxatzeagatik, Suitzako enbaxadak jakinarazi duenez. Iturri berdinak azaldu duenez, emakumezkoa eta senarra Jhadia herritik hurbil kanpatu ziren, eta hainbat lagunek osatutako talde batek eraso eta lapurreta egin zien.

Biktimak salaketa aurkeztu du larunbat honetan, baina Suitzako enbaxadak ez du kaltedunen izen-abizenik jakitera eman. Bikotea bizikletaz ari zen bidaia egiten, eta Agrako hirira zihoan, Taj Mahal eraikina dagoen hirira, alegia.

Joan den abenduan gazte bat hil zen New Delhin hainbat lagunek osatutako talde batek bortxatu ostean. Auziak sumina piztu zuen herritarren artean, eta emakumeek herrialde horretan duten segurtasun falta utzi zuen agerian.