Dennis Allex frantziarra hil duela iragarri du Al Shabab miliziak

Dennis Allex bahitu frantziarra exekutatu egin duela iragarri du Somaliako Al Shabab milicia islamiarrak. Allex 2009ko uztailean bahitu zuten, Somalian.

"16:30 GMT. Asteazkena, 2013ko urtarrilaren 16a. Dennis Allex hil egin dugu", adierazi dute Twitterren.

Hala ere, islamistek ez dute Allex non eta nola exekutatu duten zehaztu, ezta argazkirik eman ere. Iragan astelehenean, esaterako, Frantziako militar bat azken erreskate operazioan hil zutenean, hiru irudi atera zituzten.

Asteazkenean, Al Shababek bahitua exekutatzeko asmoa agertu zuen Frantziak larunbatean antolatutako erreskate operazioak huts egin eta gero. Operazio horretan 17 matxino eta bi soldadu frantziar hil ziren.

"Erreskate saiakerarekin, Frantziak Allexen heriotza zigorra sinatu du", esan zuen Al Shababek komunikatu batean.

Nahiz eta François Hollande Frantziako presidenteak Allex bahitzaileek larunbatean bertan hil zutela "zalantza barik" esan, Al Shababekoek zaintzapean zutela adierazi zuten, salbu eta erreskatearen ondorengo borroka izan zen lekutik urrun.

Informazio asko

Gainera, eta matxinoen arabera, bahitu frantziarra informazio asko eman zien azken hiru urte eta erdian egindako galdeketetan, eta horri esker "Frantziako inteligentzia sistemaren funtzionamendua hobeto ulertzeko aukera" dute orain.

Somalian gerra eta anabasa da nagusi 1991ean Mohamed Siad Barré diktadorea boteretik kendu zutenetik. Herrialdeak ez du Gobernu eraginkorrik eta islamiar milicia erradikalen esku dago, hau da, gerraren jauntxoak delakoen eskuetan, eta jauntxo horiek talde jakin batzuen eta gaizkile-taldeen interesen alde egiten dute.