Gizartea -
PEDOFILIA
Gizon bat atxilotu dute Tolosan 10 urteko neskato bati sexu-irudiak eskatzeagatik
Adingabearen gurasoek mezularitza-aplikazio baten bidez sexu-elkarrizketak aurkitu zituzten eta gertatutakoa salatu zuten polizia-etxean. Ikerketa abiarazi zuten eta sexu-izaerako hainbat argazki trukatu zituztela ere egiaztatu zuten agenteek.
EITB MEDIA
Espainiako nazionalitatea duen 26 urteko gizon bat atxilotu dute Tolosan (Gipuzkoa), adingabekoak galbideratzea egotzita, 10 urteko neskato bati sexu-mezuak eta irudiak eskatzeagatik, Guardia Zibilak jakinarazi duenez.
Adingabearen gurasoek jarri zuten salaketa, mezularitza-aplikazio baten bidez alabaren eta gizon baten artean sexu-izaerako elkarrizketak ikusi ondotik. Guardia Zibilak ikerketa abiarazi zuen eta egiaztatu zuten elkarrizketez gain, sexu-izaerako hainbat argazki ere trukatu zituztela.
Arrastoari segika, gizona identifikatzea lortu zuen poliziak eta haren etxea miatu zuten, Tolosan. Beharrezko frogak eskuratu ondoren (ordenagailu bat eta telefono mugikor bat), atxilotu egin zuten, ustez adingabeak galbideratzeagatik, eta epailearen esku utzi zuten.