'Amerikar batek nire laguna hil du'

Ertzaintzak 21 urteko gazte bat atxilotu du Andoainen, pisu-kidea hiltzea eta gorpua zenbait egunez ezkutatuta izatea leporatuta. Herrizaingo Sailak jakitera eman duenez, hilotza atzo gauean (23:45) topatu zuten, erortzear dagoen eraikin okupatu batean.

Hilotza armairu batean ezkutatuta eta manta batekin estalita zegoen.

Lehen ikerketen arabera, erasotzailea eta biktima elkarrekin bizi ziren, baina bizikidetza arazoak zituzten. Ertzaintzak 21 urteko gazte estatubatuar bat atxilotu zuen, ustezko hiltzailea zelakoan. Antza, mailu bat erabilita burutu zuen krimena.

Andoaingo bizilagunek biktimaren lagunari lagundu zioten

Gorpua atzeman eta biktimaren lagun bat korrika atera zen eraikinetik laguntza eske. Andoaingo bizilagun batzuekin egin zuen topo, eta hauek EITBri kontatu diotenaren arabera, "oso urduri zegoen, ez zitzaion ulertu ere egiten".

112ra deitzeko esan zioten, baina, "urduri zegoen eta ezin zuen telefono zenbakia markatu". Bizilagunek lagundu zioten, eta ondoren, eberaiek ere berriz deitu zutela kontatu dute, "zerbait pasatzen ari zela ohartarazteko".

Ertzaintza bertaratu zenean, garrasika, "amerikar batek nire laguna hil du", esan zuen behin eta berriz gorpua aurkitu zuenak. Gainera, "nire lagunak, 6 edo 7 egun zeramatzan desagertuta", kontatu zien.

Armairuaren barruan

Andoainen aurkitu duten gizonezkoaren gorpua deskonposizio egoeran zegoen, Herrizaingo Sailak jakitera eman duenez.

Pertsona batek eman zuen abisua atzo gauean gizonezko baten gorpua armairu baten barruan aurkitu eta gero.

Hondatutako eraikinean, ustez, "okupak" bizi ziren. Lehen solairuko geletako batean topatu du Ertzaintzak gorpua, armairu baten barruan mantaz estalita. Hainbat egun zeramatzan gorpuak bertan deskonposizio egoera dela eta.