Gizartea -
Amaia Azkueren hilketa
Amaia Azkueren familiaren abokatuak ontzat eman du epaia
Epaileak Fiskaltzaren eta akusazio partikularraren tesia erabat onartu du, baina bi aldeek Gipuzkoako Auzitegian helegitea jartzeko aukera dute oraindik.
Erredakzioa
Epaia zorrotza eta irmoa dela esan dio Euskadi Irratiari Miguel Castells akusazio partikularraren abokatuak. Familiak ere ontzat eman du epaia.
"Pozik nago, nahikotzat jotzen dut epaia, ahal zuen guztia eman duelako. Hala ere, eragindako minaren eta ezarritako neurriaren arteko proportzioa txikia da familiarentzat", adierazi du.
10 urteko zigorra ezarri dio adin txikikoen epaileak erregimen itxian akusatuari, eta beste bost zaintzapeko askatasunean, eta akusazio partikularrak eskatu bezala, bost urte horietan ezingo du ez Getariara, ez Oriora ezta Zarautzera ere hurbildu.
Zaintzapeko askatasuna amaitu eta gero, beste bi urtez debekatuta izango du Amaia Azkue zenaren senitartekoekin hitz egitea.
Epaiketan zehar akusatuak bere burua errugabe jo zuen arren, epaileak frogatutzat jo du berak hil zuela Amaia Azkue gaztea. Lapurreta, ibilgailuaren lapurreta eta bide segurtasunaren aurkako delituak ere egotzi dizkio.
