Espetxera bidali dituzte Karrantzako hilketarekin lotuta atxilotutako bederatzi lagunetatik hiru

Misael Centenoren hilketarekin zerikusia dutelakoan Ertzaintzak astelehenean atxilotutako bederatzi lagunetatik hiru espetxera bidali ditu epaileak, Eusko Jaurlaritzako Segurtasun Sailak jakinarazi duenez.

Gainerako sei atxilotuak aske gelditu dira, horietako bi kargurik gabe eta beste lau fidantzarik gabe, baina hamabost egunean behin epaitegian aurkezteko aginduarekin.

Hala ere, asteazkenean ezin izan zieten atxilotu guztiei deklarazioa hartu eta, beraz, gaur igaroko dira falta zirenak epailearen aurretik. 

31 urteko Karrantzako bizilagunaren gorpua azaroaren 31an topatu zuten Karrantza ibaian. Antza denez, azaroaren 28ko goizaldean borroka bat izan zuen Ambasaguasen eta bere hilotza handik hiru egunetara topatu zuten Karrantza ibaian.  

Balmasedako epaitegiak kasua sekretupean jarri du.