Osasun Ministerioak autoan erretzea debekatu nahi du, eta zigarro elektronikoaren erabilera mugatu

Osasun Ministerioak Tabakismoaren Aurkako Plan Integral berria azkendu du. Besteak beste, barne hartzen ditu garraio partikularretan erretzeko debekua eta tabako marken paketatze generikoa, eta legez berdindu nahi ditu zigarro elektronikoei murrizketak.

Espainiako Gobernuak bost jomugako eta 21 helburuko plana onartzea erabaki du. Horren bitartez, pandemiaren kudeaketaren ostean galdutako denbora berreskuratzeko asmoa du datozen lau urteetan. Hori dela eta, 2021-2025 Tabakismoaren Prebentzio eta Kontrolerako Plan Integralaren zirriborroa bidali die elkarte zientifiko eta medikoei eta autonomia erkidegoei, abenduaren 15a baino lehen aurkeztu ditzaten euren ekarpenak. Efe agentziak zirriborro horretarako sarbidea izan du.

Txostenak jasotzen dituen 119 orrialdeetan, Carolina Darias zuzendari duen Ministerioak gogorarazi du hamarkada bat baino gehiago igaro dela tabakismoaren aurkako osasun-neurrietan azken "funtsezko" aldaketa egin zenetik. Europar Batasunak eta OMEk markatutakoari jarraiki, orain "tabakorik gabeko belaunaldia" sortu nahi du Espainian.

Horretarako, kerik gabeko espazioak areagotzea hartuko du jomuga (horrek zigarro elektronikoak eta tabako berotuko produktuak ere hartzen ditu barne), kanpo-espazioetan bereziki. Kerik eta "zigarro elektronikoen aerosolik" gabeko gune horien artean "esparru pribatuko zenbait espazio" ere proposatu dira; garraio partikularrak, esate baterako.

Era berean, ezkutuko publizitatea ere jorratu nahi dute, eta sare sozialetan zein plataformetan produktu berri horiei promozioa egitea.

Bestalde, Osasun Ministerioak Frantzia edo Alemania bezalako herrialdeen eredua jarraitu nahi du, eta tabako kutxatilen paketatze generikoa ezarri. Hala, markei erakargarritasuna kentzea da asmoa, zigarro-kontsumoaren murrizketan laguntzeko. Gainera, tabakoari eta erlazionatutako produktuei lurrina ematen dieten gehigarriak ere debekatu nahi ditu. Dariasen Ministerioak jarduera-ildo gisa dauka "zigarro elektronikoei zerga bereziak ezartzea bultzatzea".

Plan honen arabera, "Espainiaren asmoa da 2025erako OMEk ezarritako helburua lortzea", hau da, "tabako-kontsumoaren % 30-eko murrizketa" lortzea, 2010eko datuekin alderatuta. Horretarako, tabako-produktu berrien zerga-sistema igotzeko asmoa ere badu.

Tabakoaren aurkako beste planei dagokienez, zirriborro honek aurkezten duen berritasunetako bat da Espainian "tabakoaren kultiboari alternatibak" bilatzeko premia. Gainera, ingurumenari arreta eskaintzen dio hondakinen eliminazioari dagokionez, esate baterako; hondartzetan erretzea debekatzea, lagunduko duelarik itsasoko ekosistemari "larriki" eragiten dioten hondakinak ezabatzen.

Azkeneko helburua da horrekin guztiarekin gaixotasun ez-kutsakorrek eragindako hilkortasun goztiarra heren bat murriztea 2030erako. Halaber, jarraitu nahi dute Europak igorritako gomendioa, hau da, eguneroko erretzaileen tasa % 5ean murriztea 2040rako, eta bi puntu gehiago 14 eta 18 urteko gazteen artean.

Osasun Ministeriotik adierazi dutenez, "bizitzak salbatzea helburu duten" jomuga horiek alderdi guztiek partekatu ditzaten nahi dute eta, hala, "talde parlamentarioen babesarekin Tabakismoaren Prebentzioari buruzko Akordio Nazionala ezarri".