Gizartea -
Trafikoa
Hainbat errepide itxita daude oraindik, ura edo lur-jausiak tarteko
Bigarren mailako bideak dira denak ere. Araba da lurralde kaltetuena, bost errepide baitaude zarratuta.
Eider Garaikoetxea O. | EITB MEDIA
Asteburuan Euskadi astindu duen euri denboralearen ondorioak nabarikoak dira oraindik errepide sarean. Ur-putzuak eta lur-jausiak tarteko, hainbat errepidek itxita jarraitzen dute astearte honetan, Eusko Jaurlaritzak eitb.eus-i jakinarazi dionez.
Araba da lurralde kaltetuena, eta bost bide ditu zarratuta uragatik. Honakoak dira: A-3310 errepidea, Pobes parean; A-4302a, Iruña Okan; A-3302a, Mendotzako irteeran; A-4202 errepidea, Guardia parean; eta azkenik, A-3312a, Erriberabeitia eta Billoda artean.
Bizkaian, ibilgailuentzat zarratuta daude BI-735 errepidea, Makro inguruan (Erandio), eta BI-745a, Trapagaranen.
Gipuzkoari dagokionez, luiziengatik itxita daude GI-2634 errepidea, Errezilen, eta GI-3192a, Beasain parean.
Gainerakoan, txapa istripuak izan dira A-8ko Bizkaiko zatian, Bilbon eta Arrigorriagan, Donostiako noranzkoan, eta ilarak sortu diren arren, 08:30erako konponduta zeuden.
