Gaueko tabernak irekitzea aztertuko dute gaur Osasun Ministerioak eta erkidegoek

Asteazkenero bezala, Espainiako Osasun Ministerioak eta autonomia erkidegoek bilera telematikoa egingo dute. Gaurko batzarrean, Janssenen txertoa 40-49 urtekoei ere ematea onartuko dute, eta, horrez gainera, abuztuaren 14tik itxita dauden gaueko tabernak berriro irekitzea aztertuko dute. Carolina Darias Osasun ministroa Iruñean dago gaur, eta bertatik zuzenduko du Espainiako Osasun Sistema Nazionaleko Lurraldearteko Kontseiluko Osasun Publikorako Batzordearen bilera.

Jose Maria Vergeles Extremadurako Osasun kontseilariak iragan astean aurreratu zuen gaueko aisialdia berriro irekitzeko lanean ari zirela. Lantzen ari diren zirriborroaren arabera, ezingo da pistan dantzarik egin, bezeroek mahaietan eserita egon beharko dute eta goizaldeko ordu biak baino lehen itxi beharko dituzte ateak.

Extremadurak baldintza horietan berriro irekitzearen alde egin du, betiere, lurraldea lehenengo alerta mailan edo normaltasun berria deiturikoan baldin badago.

Kataluniak ere gaueko aisialdia modu arautuan "laster" irekitzearen alde egin du, kale-edana gutxitzeko. Josep Maria Argimon Kataluniako Osasun kontseilariak azpimarratu duenez, jendeak "aisialdirako" guneak behar ditu gauean.

Atzo, Kataluniako Justizia Auzitegi Nagusiak uko egin zion patronalak diskotekak berriro irekitzeko egindako eskaerari, baina atea zabalik utzi zuen.

Kantabriako Gobernua ere gaueko tabernak berriro irekitzearen aldekoa da, betiere, ostalaritzako beste lokal batzuen antzeko baldintzetan eta osasun neurriak gordeta.