57ra jaitsi dira covid-19 kasu berriak Nafarroan, baina positibotasuna % 4,7ra igo da

Atzoko igoera txikiaren ondotik (81 kasu), berriro aste hasierako datuetara jaitsi da covid-19 kasu berrien kopurua Nafarroan: 57 kutsatze zenbatu ziren atzo, larunbata, duela astebeteko datuekin alderatuta, 13 kasu gehiago.

Foru Gobernuak emandako behin behineko datuen arabera, koronabirusa atzemateko 1.211 PCR proba eta test antigeno egin ziren atzo, eta positibotasun tasa % 4,7an kokatu zen, bezperan baino ia puntu bat gehiago.

Maiatza hasieratik beheranzko joera nabarmena bada ere, azken aste hau gorabeheratsua izan da, eta, datuei erreparatuta, jaitsiera moteldu egin dela esan daiteke: astelehenean 53 zenbatu ziren (% 2,7), asteartean 50 (% 2,3), asteazkenean 93 (% 4,4), ostegunean 77 , ostiralean 79 (% 3,8) eta atzo 57 (% 3,9).

Erregistratutako kasu berrien adin-tarteei dagokionez, talde nagusia 15 urtetik beherakoena izan zen ( % 30) eta 30-44 urte bitartekoena ( % 25) ondoren. Gero, 15-29 urte artekoak ( % 23) eta 45-59 urtekoak ( % 13) zeuden eta, azkenik, 60-75 urte bitartekoak ( % 9). 75 urtetik gorakoen artean ez zen kasurik izan.

Gainera, bi heriotza izan ziren, 74 urteko emakume batena eta 92 urteko beste batena. Nafarroan, guztira, 1.185 heriotza baieztatu dira pandemia hasi zenetik.

Atzo ez zen ospitaleraturik izan covid-19agatik Nafarroan. Gaur egun, 47 gaixo daude ospitaleratuta koronabirusagatik, horietatik 11 ZIUn.

Txertaketari dagokionez, berriz, atzo 4.421 dosi jarri ziren Foru Erkidegoan. Hala, orotara 393.081 txerto jarri dira Nafarroan, eta 141.149 pertsonak, jada, osatu dute txertaketa prozesua.

Datorren astean hasiko dira AstraZenecarekin txertatu zituzten 60 urtetik beherako oinarrizko langileei bigarren dosia jartzen. Berez Pfizer jasoko dute, eta AstraZeneca aukeratzen dutenek baimen informatua sinatu beharko dute.

Positibitatea % 5etik gora dagoen arren EAEn, ZIUak apirileko mailara jaitsi dira

Pandemiaren bilakaera ez da oraindik lasaitzen hasi EAEn. Larunbat honetan 306 positibo berri atzeman dituzte, bezperan baino 84 gutxiago. Hori bai, aurreko igandeko datuarekin alderatuz gero, 50 kasu gehiago atzeman dira oraingo honetan.

Atzo 6.008 proba diagnostiko egin zituzten eta 306k izan zuten emaitza positiboa ( % 5,1), Eusko Jaurlaritzako Osasun Sailak larunbat honetan zabaldutako datuen arabera. Positibotasun tasa % 5,1ekoa izan zen aurreko egunean, beraz, berdin eusten dio transmisioak.