82 covid-19 kasu atzeman dituzte Nafarroan, beheranzko joera berretsiz

Nafarroako Osasun Sistemak 82 kasu positibo berri atzeman zituen atzo, aurreko egunean baino 14 gutxiago, Nafarroako Gobernuaren behin-behineko datuen arabera.

Ostiralean 2.492 proba egin zituzten (1.661 PCR eta 831 antigeno test) eta horrek esan nahi du positibotasuna % 3,29koa izan zela. Foru Erkidegoak zazpi egun jarraian daramatza % 5eko positibotasunetik behera.

Astean zehar, 139 kasu atzeman dituzte astelehenean ( % 4,8), 89 asteartean ( % 2,9), 97 asteazkenean ( % 3,4), 96 ostegunean ( % 4,1) eta 82 ostiralean.

151 pertsona daude une honetan ospitaleratuta covid-19agatik (10 pertsona ospitaleratu zituzten atzo) eta horietatik 23 ZIUn daude, bezperan baino bi gutxiago.

Gainera, atzo ez zen hildakorik izan, baina aurreko egunetan hil zen pertsona baten kasua jakinarazi zen (97 urteko gizona).

Nafarroan, guztira, 1.079 pertsona hil dira covid-19arekin, pandemia hasi zenetik, eta 50.299 pertsona kutsatu dira.

Zonaldeka, Iruñean eta bere eskualdean errepistratu ziren kasu positibo berrien % 55, Tuteran % 7 eta Lizarran % 2 eta gainerakoak Nafarroan zehar banatu egon ziren.

Erregistratutako kasu berrien adin-tarteei dagokionez, 45 eta 59 urte bitartekoak izan ziren gehienak ( % 35), 15 eta 29 urte bitartekoak hurrengoak ( % 18) eta 15 urtetik beherakoak ondoren ( % 16). 30-44 urtekoak ( % 14) 60-75 bitartekoak ( % 11) eta 75 urtetik gorakoak ( % 6) izan ziren hurrengoak.

613 kutsatze EAEn

Euskal Autonomia Erkidegoan, berriz, 613 positibo berri atzeman dituzte azken egunean, bezperan baino 30 gutxiago: 367 Bizkaian, 162 Gipuzkoan eta 71 Araban. Positibotasuna % 5,5era igo da hiru egunez jaisten aritu ostean.