Gizartea -
Gertakizuna Bilbon
'Gizonezkoa metrotik irten da eta jendea sastatu du’
"Bikote bati errieta eginez irten da erasotzailea metrotik", azaldu du lekuko batek, "ondoren, labana bat atera du eta bost lagun sastatu ditu, Poliziak atxilotu duen arte".
Erredakzioa
"Erasotzaileak jendea sastatu du: guztira, bost lagun zauritu ditu Poliziak atxilotu duen arte", azaldu dio Radio Euskadiri astelehen honetan Santutxuko erasoaren lekukoa izan den gizonezko batek.
"Neskak laguntza eske egindako oihuak entzun ditugu eta guztiok kalera irten gara", azaldu du inguruan denda bat duen pertsona batek. Erasotzaileak "parean aurkitzen zituen guztiei eraso die labanaz; drogen eraginpean zegoela ematen zuen".
"Jendea oso urduri zegoen, oihuka eta negarrez", azaldu du metroaren sarreran lagun baten zain zegoen beste lekuko batek. "Polizia heldu da eta anbulantzia bat ere bertaratu da", gaineratu du neskak, "anbulantziak neska bat ospitalera eraman du eta mutiko bat bertan artatu dute osasun langileek, lurrean".
Erasoaren lekukoa izan den beste emakumezko batek azaldu duenez,"metrotik irteten ikusi dut, jendea sastatzen hasi denean. Kaosa izan da".
