Gizon bat larri, Barakaldon sei labankada jaso eta gero

55 urteko gizon bat atxilotu du Ertzaintzak Barakaldon, beste gizon bati sei sastakada sartzeagatik hilketa saiakera egotzita. Biktima larri zaurituta dago, Gurutzetako ospitalean.

Segurtasun sailak esan duenez, larunbatean, 11:00etan, Barakaldon lekutik ihes egin duen gizon batek beste pertsona bati labanaz eraso diola ohartarazi diote Ertzaintzari.

Ertzaintzaren zenbait patruila eta anbulantzia bat bertaratu dira, eta lekuan ikusi dute biktimak, gizonezkoa, sei sastakada zituela, hiruna albo batean eta bizkarrean.

Osasun langileek artatu ostean, egoera larrian eraman dute Gurutzetako ospitalera.

Ertzainek ustezko erasotzailearen datuak eskuratu dituzte, eta bere etxebizitzara joan dira. Bertan atxilotu dute hilketa saiakera leporatzen zaion 55 urteko gizona. Polizia etxera eraman dute dagozkion eginbideak hasteko, epailearen aurrean jarri baino lehen.

Gertatutakoa argitzeko ikerketa abiatu du Ertzaintzak.