Gizon bat atxilotu dute Bilbon emakume bati ukituak egin eta ertzainei tu egiteagatik

Ertzaintzak 50 urteko gizonezko bat atxilotu du Bilbon, sexu-abusuen delitu bat egotzita, kalean emakume bati ukituak egin eta izutzeagatik, bai eta agintaritzaren agenteen aurkako atentatu-delitu bat ere, indarkeriaz aurre egin eta esku hartu duten ertzainei listua bota dielako.

Segurtasun Saileko iturriek jakitera eman dutenez, gertakariak goizeko bederatzi eta erdiak baino lehentxeago izan dira, Alameda Urquijo inguruan. Atxilotua bizikletan zihoan emakume baten aurretik eta bidea oztopatu ostean ukituak egin eta emakumea beldurtu du.

Emakumeak bere burua defendatu du, eta biktimaren oihuak entzutean, hainbat pertsona hurbildu zaizkio laguntzera. Laguntzera gerturatu direnek eman diote Poliziari abisua.

Udaltzaingoa eta Ertzaintza arduratu dira gertakarietan parte hartu duen erasotzaileaz. Gizonak ez zeraman derrigorrezkoa den maskara eta agenteen eskakizunei ere uko egin die.

Erasotzaileak agenteei aurre egin die eta bertara joan diren bi ertzainei listua bota die. Azkenean, udaltzainen patruila baten laguntzarekin, atxilotu egin dute.