66 eta 42 urteko bi gizon atxilotu dituzte Gasteizen bikoteei eraso egiteagatik

Gasteizko Udaltzaingoko agenteek 66 eta 42 urteko bi gizon atxilotu zituzten igandean, ustez genero-indarkeriako hainbat delitu egiteagatik, bikotekideei eraso egiteagatik.

Poliziaren lehen esku-hartzea igande arratsaldean izan zen, 14:30ak aldera, Judimendi auzoko etxebizitza batean agenteak bertaratzeko deia jaso zutenean. Etxebizitza barruan eztabaida gogor bat eta emakume baten oihuak entzuten ziren laguntza eske.

Agenteak etxeratzean, gizon batek ireki zuen atea, eta haren ondoan zegoen emakumea. Gizonarekin hizketan ari zirela egiaztatu zuten agenteek gizonak emakumeari eraso egiteaz gain, Poliziari deitzea eragotzi ziola. Agenteek gizona atxilotu zuten eta gaur goizean epailearen esku geratu da.

Igande gauean, udaltzainek 41 urteko gizonezko bat atxilotu zuten, ustez genero-indarkeriako delitu bat egiteagatik. Pertsona anonimo batek 092 zenbakira deitu eta etxebizitza batean emakume bati eraso egiten ari zirela ohartarazi zuen. Deia egin zuen pertsonak agenteei jakinarazi zienez, ustezko erasotzaileak etxetik alde egin zuen, eta etxean bertan aurkitu zuten emakume bat bi seme-alaba adingaberekin. Haietako batek aitortu zuen gizonak amari eraso egin ziola. Agenteek ustezko erasotzailea aurkitu eta atxilotu zuten, eta gaurko egunean zehar epailearen esku uztea espero da.

Aitari erasoa

Bestalde, udaltzainek 27 urteko gizonezko bat atxilotu zuten larunbat gauean, aitari eraso egitea egotzita.

Mateo Mugika inguruan zegoen patruila batek eztabaida gogor bat entzun zuen, eta gizonezko batek beste bat jotzen zuela ikusi zuen. Agenteak bertaratzen ari ziren bitartean, bigarren gazte bat ere gizonari kolpeka hasi zitzaion. Beranduago aita bat eta bere bi seme zirela egiaztatu zuten.

Patruilak erasotzailea atxilotu eta Agirrelandara eraman zuen. Behin Guardiako Epaitegiari zegozkion eginbideak amaituta, aske geratu zen. Zauritua, ostera, anbulantzia batek artatu zuen, eta ospitalera eraman zuen.

Trafiko-istripuak

Udaltzaingoak hamabost istripuren berri izan ditu joan den ostiraletik, eta hiru pertsona zauritu dira haietan. Gainera, prebentziozko sei alkoholemia-kontrol egin dituzte, eta 130 gidarik probak egin dituzte; horietako bik positibo eman dute, eta salatu egin dituzte.

Lokal zigilatuak

Joan den asteburuan, Udaltzaingoak bi ostalaritza-establezimendu zigilatu zituen Eusko Jaurlaritzako Osasun Publikoaren eta Adikzioen Zuzendaritzaren aginduz.

Larunbatean, Aiztogile kaleko lokal bat zigilatu zuten agenteek, eta igandean, Armentia gaineko jatetxe bat.

Sute txikia

Igandean, Artapadura kalean bertan behera utzitako enpresa batean izandako sutearen abisua jaso zuten suhiltzaileek. Plastiko batzuek su hartu izanaren ondorioz sortu zen sua txabola baten barruan, eta urarekin itzali zuten.