Ordiziak argitu du pasa den asteburuan edukiera gainditzean itxi zituela kaleak

Ordiziako Udalak argitu duenez, joan den asteburuan, Santa Ana jaiak ospatzen ari zirenean, edukiera gainditu bezain laster itxi egin zituzten kaleak.

Udalak ohar baten bidez jakitera eman duenez, Santa Ana jaiak bertan behera uzteko erabakia irmo mantendu dute, pasa den ekainaren 24an erabaki bezala.

Horrez gain, joan den uztailaren 23an Ordiziako Udala osatzen duten alderdi guztiek deialdi bateratua egin zuten, “festarik eta ekitaldirik ez zela egongo” gogoratuz eta ”arduraz jokatzeko deia” eginez.

Udalak gogorarazi duenez, "kaleetan edukiera gaindituz gero dena ixteko" agindu zuen, eta ostalaritza sektorearen itxiera ordutegia 01:00etara mugatu zuen, eta kalean terrazatik kanpo kontsumitzeko aukera 23:00ak arte izatera mugatu zuen. Ordizia joan den ostegunean atera zen Osasun Sailak ezarritako neurri murriztaile berezietatik.

Ildo horretatik, Udalak nabarmendu du neurri murriztailerik hartu izan ez balu, ostalaritzako establezimenduak 04:30ak arte egongo liratekeela zabalik, Eusko Jaurlaritzaren ordutegi muga berria indarrean sartu arte. Izan ere, ordutegi muga berri horrekin, 01:30ak arte bakarrik ireki ahal izango dute ostalaritzako lokalek, eta kalean kontsumitzeko aukera 24:00ak artekoa izango da. Udalak, beraz, “Santa Ana jaiek ospatu beharko liratekeen egunei begira neurri zorrotzagoak” hartu dituela nabarmendu du.

Era berean, “Zaintzaren aldetik Udaltzaingoaren zerbitzua indartu da, egun horietan bere lanaldia establezimenduak itxi arte luzatuz”, eta zaintza lanak burutu dituzte, “bai maskararen erabilera, bai edukiera eta baita segurtasun distantziak ziurtatzeko ere”.

“Oro har ordiziarren erantzuna oso ona” izan dela txalotu du Udalak. Azkenik, "Erantzukizunez jokatzeko" deia egin die herritarrei, "Jende pilaketak saihestuz, maskara uneoro erabiliz eta segurtasun eta osasun neurriak errespetatuz".