Gizartea -
Koronabirusa
Nafarroa "ondo kokatuta eta sistema indartsuarekin" sartuko da malgutze prozesuan
Konfinamenduaren malgutze prozesua Nafarroa barruan ere "asimetrikoa" izatearen alde egin du Chivitek, gaixotasunaren eragina ezberdina izan baita lurraldeka.
Agentziak | Erredakzioa
Nafarroa konfinamenduaren malgutze prozesuan sartuko da astelehen honetan “ondo kokatuta”, osasun sistema “indartsua” duela konprobatuta. Sistemak ondo eutsi dio koronabirusaren momenturik gogorrenari, baina bere mugara iritsi gabe. Guztira, 462 pertsona hil dira Foru Erkidegoan COVID-19aren ondorioz.
Hori da Maria Chivite Nafarroako presidenteak aste honetan bertan adierazi duena. Chivite, gainera, malgutze prozesua Nafarroa barruan eremodu “asimetrikoan” egitearen aldekoa da. Espainiako Gobernuak ezarritako egutegia errespetatuz, baina irizpide propioekin. Izan ere, Nafarroako zonalde ezberdinetan kutsatze indize ezberdinak izan dira.
Horrela, COVID-19ak eragin handiagoa izan du Artaxoan (35,36 kasu mila biztanleko), Tafallan (23,67), Cintruenigon (19) edo Agoitzen izan dira, eta beste herri batzuetan, gaixotasunaren eragina txikiagoa izan da: Leitzan (1,52 kasu mila biztanleko), Lesakan (1,43) edo Isaban (2,59).
Kutsatzeen erritmoa nabarmen handiagoa izatera heldu zen arren, azken egunetan % 1etik beherakoa da, eta datu horiek, Santos Indurain Osasun kontseilariaren ustez, “itxaropentsuak” dira. Larunbatera arte, Nafarroan 4.888 positibo antzeman dira PCR proben bidez eta beste 1.523 antigorputzetan oinarritutako proben bidez.
Atzora arte, 1.979 gaixo ospitaleratu dituzte Nafarroan (132 Zainketa Berezietako Unitatean) eta gainontzekoei etxeetan egin zaie gaixotasunaren jarraipena. Guztira, 460 hildako izan dira eta 2.281 sendagiri epidemiologiko eman dituzte.
Gaur egun, 38 paziente daude Zainketa Berezietako Unitateetan. Momenturik larrienean 97 egon ziren, baina, orotara, 130 hartzeko prest zeuden.
PCR proben kasuan, egunean 400 egitetik 1.400 egitera pasa dira. Gainera, beste laborategi batzuk proba egiteko egokitzea beharrezkoa balitz, egunean 6.000 proba egiteko aukera egongo litzateke.
Eragina ekonomian
Alarma egoera ezarri zenetik, Nafarroan 3.200 langabe gehiago daude eta Aldi Baterako 6.500 Lan Erregulazio bideratu dira 56.000 langileri eragiten dietenak. Horietariko 5.000 langile Nafarroako enpresarik handienekoak dira, Volkswagen lantegikoak. Volkswagenek aste honetan bertan ekin dio berriro bere jarduerari, lau eguneko txandetatik bi egun bakarrik lan eginda eta hiru txandetatik bakarra erabilita. Hala ere, asmoa erritmoa pixkanaka handitzen joatea da.
