Gizartea -
COVID-19
Etxebizitzetan "gehiegizko zaratak ekiditeko" eskatu du Donostiako Udalak
Azken zazpi egunetan, 092 telefonoak bizilagunen kexak aitortzeko 70 dei baino gehiago jaso ditu, batez ere, musikaren bolumenagatik, baimendutako dezibelioak gainditzen zituelako.
Agentziak | Erredakzioa
Donostiako Udalak herritarren laguntza eskatu du etxebizitzetan "gehiegizko zaratak ekiditeko". Udaltzaingoak COVID-19ari aurre egiteko konfinamendua hasi zenetik kexak helarazten dituzten bizilagunen deiak ugaritu egin direla adierazi du eta horrek zaildu egiten duela pertsona ahulen eta osasun-arloko profesionalen atsedena.
Donostiako Udalak jakitera eman duenez, azken zazpi egunetan 092 telefonoak kexak aitortzeko bizilagunen 70 dei baino gehiago jaso ditu, batez ere, baimendutako dezibelioak gainditzen zituen musika dela eta.
Martin Ibabe Herritarren Segurtasunerako eta Babes Zibilerako zinegotziaren esanetan, "dei gehienak adineko pertsonak edo gaixoak egin dituzte, zaurgarritasunagatik edo osasun egoeragatik erosketak egitera ere atera ezin direnak".
Era berean, Ibabek gehiegizko zaraten berri ematen ari diren beste kolektiboetako bat osasun-langileak dira, "aparteko lan-karga pairatzen ari dira, eta ezin dute atsedenik hartu gehiegizko dezibelioen ondorioz" azpimarratu du.
Horregatik, etxebizitza guztien laguntza eskatu du, eta honakoa gaineratu du: “Ulertzen dugu konfinamendu egoera zaila dela, eta bozgorailuak kalera ateratzea egoera eramangarriagoa egiten duela. Baina aitzitik, pertsona asko kaltetzen ari gara, besteak beste, egunero egoera zail honi aurre egiteko borrokan ari diren profesionalei”.
