Senideak, atsekabetuta Gipuzkoako egoitzetako krisiaren kudeaketagatik

Senideak, mendekotasuna duten pertsonen senideen eta Gipuzkoako adinekoen zaintzarekin sentsibilizatuta dauden pertsonen elkarteak, "atsekabe handia" agertu du koronabirusaren osasun-krisiaren aurrean "zentro askotan egiten ari den kudeaketagatik, baina ez guztietan".

"Gure senideek bizi duten inkomunikazio egoera salatu nahi dugu", adierazi du Senideak elkarteak ohar batean, eta "egoitzetako arduradunek eta goi kargudunek ez dute komunikazio bideak gaitzeko ahaleginik egiten", gaineratu du.

"Premiarik handienarekin, bertakoen eskura dauden baliabide guztiak jar ditzatela exijitzen dugu, senitartekoak haiekin harremanetan jarri ahal izateko. Gure ustez, gaur egun ditugun teknologiekin, ez da hain zaila deiak eta bideo-deiak egunero antolatzea", azpimarratu du komunikatuak.

Gainera, "lanean ari diren langileen baliabide falta" kritikatu du elkarteak. Izan ere, haren ustez, "protokoloak ez dira behar bezala ezartzen kasu askotan, eta, oro har, laguntzaileek ez dute maskararik erabiltzeko aukerarik ere".

"Egoitzetan bizi diren pertsonen kalteberatasuna erabatekoa da. Beraz, ezinbestekoa da zentroak garbi izateko arreta eta erraztasun guztiak izatea, desinfektatuta, kutsatzeko arriskurik gabe eta ondo komunikatuta egoteko", azpimarratu du elkarteak.