Nafarroak ere izango du garraio-txartel bakarra

Lurralde Kohesiorako Departamentuko kontseilari Bernardo Cirizak iragarri duenez, Nafarroako Gobernuak garraio-txartel bakarra ezarriko du Foru Erkidegoan, Bidaiarien Hiriarteko Garraioaren Plan Integralaren barnean.

Batzorde parlamentarioan adierazi duenez, garraio-zerbitzuen emakiden berrikuntza eginda gauzatuko da txartela, hau da, Plan Integralaren lehen fasea amaituta. Sistema berri hori "ordainketa-bide integratu bezala" bideratuko da Nafarroako zerbitzuetan.

Gainera, zehaztu du, txartel bakar berri honek "garraio publikoaren erabilpena sustatzeko tarifa-politikak garatzeko tresna gisa" balio izango du.

Irudi korporatibo berria, NBUS zerbitzuan

Horrez gain, Gobernuak iragarri du NBUS zerbitzuak irudi korporatibo berria izango duela; diseinua "ibilgailuetan eta gainerako elementuetan" izango da ikusgai, hau da, geltokietan eta web orrietan.

Irudi korporatibo berri hau azaroan eskuragarri izango den Iruñea-Soria kontzesioaren hiru autobusetan agertuko da, sailburuak Lurralde Kohesioko Batzordean azaldu duenez.

Modernizazio-sistema berri bat ere ezarriko dute; "erabiltzailearentzako informazioa hobetuko da", eta, halaber, Administraritzak, "baliabide teknologiko eraginkorrak izango ditu, kontratuen beharrak betetzen direla zaintzeko"; besteak beste, maiztasunak, ordutegiak eta ibilgailuak zainduko dituzte.