Banda zabala Nafarroako 36 udalerritara iritsiko da 2020an

Erroibarren eta Nafarroako Pirinioetako eremuan kokatutako 36 udalerrik banda zabaleko konexioa izango dute 2019 bukatu baino lehen edo 2020 hasieran beranduenez.

Hori adierazi du Juan Cruz Cigudosa Unibertsitate, Berrikuntza eta Eraldaketa Digitaleko kontseilariak udalerrietako ordezkariekin udaletxean izandako bileran.

Kontseilariarekin batera, Eraldaketa Digitaleko Guzman Garmendia zuzendari nagusiak, Iñaki Pinillos NASERTIC enpresako zuzendariak eta Erroibarreko Enrique Garralda alkateak ere hartu dute parte bileran, baita gainerako udaletako alkateek eta Auritzeko, Orreagako, Esteribarreko eta Artzibarreko ordezkariek ere.

Foru exekutiboaren arabera, banda zabala izango duten udalerrietan 4.000 biztanle inguru bizi dira.

Neurrietako batek korporazio-sarearen hedapena jasotzen du, horren helburu da Nafarroako Gobernuko egoitzei konexioa eskaintzea eta, horrela, zerbitzu publikoetarako sarrera erraztea eta administrazioaren kudeaketaren eraginkortasuna handitzea.

Hori dela eta, 34 udalerritako 67 egoitza publikok izango dute abiadura handiagoko konexioa.

Hobekuntza horrekin, Nafarroako Gobernua gertuago egongo da. Eten digitala deuseztatzeko eta Nafarroako biztanle guztiei sareko abiadura eta kalitate aukera berdinak eskaintzeko helburutik bultzatu dute neurria.

Bileraren ondoren, kontseilariak beste hitzordu bat aurreratu du Erronkaribarreko udalerriekin, Pirinioetan zerbitzua osatzeko helburu dutela.