Gizon batek konorterik gabe utzi du emakume bat Gasteizen, ukituak egin eta jo ostean

28 urteko gizonezko bat atxilotu dute Gasteizen emakume bat ukabilkada batez konorterik gabe uzteagatik eta horren aurretik ukituak egiteagatik.

Eusko Jaurlaritzaren Segurtasun Sailak jakitera eman duenez, 5:20 aldera izan da erasoa, Foruen plazan, hiriko jaiak amaitu eta ordu batzuetara.

Plaza horretan neska-mutil koadrila bat zegoen, eta atxilotua gerturatu eta nesketako bati ipurdia ukitu dio.

Emakumeak aurre egin dio berehala, eta orduan, gizonak ukabilkada bat eman dio aurpegian eta konorterik gabe utzi du.

Neskaren lagunek erasotzailea harrapatu eta Ertzaintzari deitu diote. Hala, sexu-eraso delitu batengatik eraman dute atxilotuta.

Neska, berriz, Txagorritxu ospitalera eraman dute, eta bere onera etorri da.

Udalak emakumearen esku jarri ditu behar dituen baliabide guztiak, osasun laguntza, psikologikoa, juridikoa, babesa, etab.

Ohar batean, Udalak "erabateko gaitzespena eta errefusa" agertu du erasoaren aurrean, eta babesa eta gertutasuna adierazi die biktimari eta bere senideei.

 

-------------------------------------------

Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak eta / edo deitu doako telefono hauetako batera: 900 840 111 (Euskadin) edo 016 (Estatu osoan). Lehenak arrastoa uzten du fakturan eta telefonoan; bigarrenak, telefonoan. Beraz, ez ahaztu ezabatzea.