Gizartea -
'Tiburon' operazioa
7 lagun atxilotu eta miaketak egin dituzte Bizkaian 'Gure Leire' ontziarekin lotuta
Ondarroako eta Berriatuko hiru etxebizitzatan egin dituzte miaketak. Arrantza-ontzian zihoazen zazpi tripulatzaileak, armadorea eta patroia barne, epailearen aurrera eramango dituzte.
AGENTZIAK | ERREDAKZIOA
Azoreetako iparraldean maiatzaren 27an 2.500 kilo kokainarekin porturatu zen 'Gure Leire' Ondarroako arrantza-ontzia Galiziako kostaldera zihoan, droga eramatera. Ontzia Surinametik atera zen ordu batzuk lehenago eta, esan bezala, bi tona droga zeramatzan.
Horixe da Maica Larriba Pontevedrako Gobernuko ordezkariordeak, Imelda Capote Galiziako Zerga Administrazioko ordezkari bereziak eta Jaime Gaya Galiziako Aduanetako buruak azaldu dutena, arrantza-ontzitik droga atera eta zazpi tripulatzaileak (galiziarrak eta euskaldunak, guztiak) Vigon atxiki ostean.
Horiek guztiak epailearen aurrera eramango dituzte, Auzitegi Nazionalak hala eskatu baitu.
Gainera, zazpi pertsona horiek atxilotzeaz gain, miaketak egin dituzte Ondarroako eta Berriatuko hiru etxebizitzatan, 'Tiburon' operazioaren barruan.
Ikerketa apirilean abiatu zuten A Coruñako portuan. 'Gure Leire' ontziak susmoak eragin zituen zaindarien artean, Imelda Capotek jakitera eman duenez.
Capotek gaineratu du jatorri-portua Ondarroan duen arrantza-ontziaren gaineko susmoak zabaldu zirela, narkotrafikoarekin zerikusia izan zezakeelakoan.
Ikerketak zehaztu duenez, 80 milioi eurora hel zitekeen konfiskatutako drogaren balioa.
Oraindik ere, operazioak eta ikerketak zabalik diraute, Galiziako Zerga Administrazioko ordezkariak aurreratu duenaren arabera.