Bentzeno isuriak murrizteko agindu die Jaurlaritzak Durangoko bi enpresari

Eusko Jaurlaritzak errekerimendua helarazi die Durangoko (Bizkaia) bi galdategiri euren ekoizpen prozesuan bentzeno isuriak murritz ditzaten, eta hilabeteko epea eman die kopuruok zuzentzeko.

Exekutiboak ohar batean adierazi duenez, emisiook "legezko mugatik behera daude, baina denboran mantendu dira". Hala, "herritarren osasuna babesteko neurriak indartzeko" hautua egin du Jaurlaritzak.

Durangoko aire kalitatea kontrolatzeko kanpaina batean atzeman zituzten konposatu horren arrastoak. Durangoko Udalari gaur jakinarazi zaio, eta Jaurlaritzak ez du zehaztu zein enpresari agindu dion errekerimendua.

Ingurumen Saileko teknikariek "bentzeno arrastoak" atzeman zituzten Durangoko airean. Herriko jarduera industrialak kontuan hartuta, ez zen ulergarria hidrokarburo lurrunkor hori atzematea, eta hori dela eta, ikerketa sakonagoa egin zuten. Gerora egiaztatu ahal izan zutenez, herriko bi galdategik botatzen zuten konposatua.

Enpresok, berez, ez zuten gai hori erabiltzen, baina ekoizpen fasean sortzen zutela baieztatu ahal izan dute teknikariek.

Hidrokarburo horren eraginpean egotea "oso arriskutsua da", Jaurlaritzak gogorarazi duenez.

Udalak "lasaitasuna" eskatu du eta bentzeno emisioak osasunean ez duela eragiten azaldu du

Durangoko Udalak "lasaitasun" mezua bidali du ostegun honetan. Azaldu duenez, egindako analisiek erakusten dute ez duela eraginik herritarren osasunean.

Ohar bidez jakinarazi duenez, antzemandako emisioak "legeak ezarritako parametroen barruan daude".

Halaber, "erabateko lankidetza" eskaini dio Eusko Jaurlaritzari eta fundizio horiek "kontrolatzeko eta zaintzeko" eskatu du. Horrez gain, ezinbestekotzat jo du enpresek neurri zuzentzaileak hartzea.

Bestalde, kasuaren inguruko jarraipena egiteko eta informazioa emateko eskatu dio Udalak Ingurumen sailburuordetzari.