Oraindik ez dituzte itzali Lesakan eta Beran piztutako suteak

Oraindik ez dituzte itzali Lesakan eta Beran bart piztutako suteak, Nafarroako Gobernuak jakitera eman duenez. Halere, itxaropena dute ondorengo orduotan klimatologia alde izatea, euria egin lezakeelako eta haizeak baretzera egingo omen duelako. Suhiltzaileen lana asko erraztuko luke horrek.

21:55 aldera jasotako dei batek Lesakako Zelain auzoan zegoen suteaz ohartarazi zituen 112 larrialdi zerbitzuak. Zenbait etxebizitza eta zuhaizti daude sutetik gertu, baina dirudienez Lesaka erdigunetik urrun piztu zen sua.

Atzo gauetik dabiltza lanean, beraz, Oronozeko suhiltzaileak. Berakoak ere izan ziren bertan hasiera batean, baina 00:30ean, aipatu udalerrian piztutako beste sute bat itzaltzera joan behar izan ziren.

Oraindik sua itzaltzea lortu ez dutela ikusita, Babes Zibileko Zerbitzuek ez dute baztertzen helikopteroak eta hegazkinak bidaltzea.