Gizartea -
Iruñea
Barkosek dio Maravillas gaztetxearen auzian segurtasuna izan dutela lehentasun
Nafarroako presidentea Parlamentuan izan da gaur Rozalejo jauregia ixteko Gobernuak hartutako erabakiaren nondik norakoak azaltzeko.
Agentziak | Erredakzioa
Uxue Barkos Nafarroako presidentearen esanetan, Maravillas gaztetxearen auzian segurtasuna izan dute beti kontuan, bai eraikinarena berarena eta inguruko etxebizitzena, zein barruan ziren lagunena.
Orain Bai taldeak eskatuta, agerraldia egin du gaur Barkosek Nafarroako Parlamentuko batzorde batean. Barkosek azpimarratu du Rozalejo Markesaren Jauregiaren segurtasuna "arrisku bizian" zegoela, eta horregatik erabaki zutela Foruzaingoak eta teknikariek eraikinean sartzea. Urtarrilaren 8an gaztetxea hustera joan ez zirela erantsi du Barkosek.
Gaztetxeko kideen jarrerari buruz, Nafarroako presidenteak esan du "ezinezkoa" dela "hitz egin nahi ez duenarekin hitz egitea". Barkosen hitzetan, "gazteek bunkerra eraiki zuten eraikinaren barruan; euren elkarrizketa borondatearen erakusle argi da hori".
