Gizartea -
Foru Gobernua
Nafarroako berdintasun lege berriak emakumeen ahalduntzea bultzatuko du
Arauak 63 artikulu ditu, eta Parlamentuak otsaila bukaeran eztabaidatu dezake. Olloren ahotan, legeak “Nafarroa abangoardian kokatuko du”.
Agentziak | Erredakzioa
Emakume eta Gizonen Berdintasunerako foru lege-proiektua otsaila amaieran eztabaidatu dezake Nafarroako Parlamentuak. “Emakumeen giza eskubideetatik abiatu” eta emakume zein neskatoen ahalduntzea “lehentasunezko ardatz” du arauak, Ana Ollo kontseilariak azaldu duenez.
Kontseilariak prentsaurrekoa eman du goizean, lauko gobernua osatzen duten indar politikoen ordezkariekin batera.
Herritarrekiko eta Erakundeekiko Harremanetako kontseilariaren hitzetan, legeak “Nafarroa abangoardian kokatuko du, erkidego aitzindari eta aurreratu gisa”, araudiak gizonen eta emakumeen arteko “benetako berdintasuna bultzatzen duelako”.
Arauak “emakume zein neskatoen ahalduntzea lehentasunezko ardatz bezala kokatzen du”, azpimarratu duenez. Era berean, zeharkakotasuna, gizarte aktibo eta berdina lortzeko emakumeen parte-hartzea, bizitzaren jasangarritasuna eta ezagutza oinarrizko printzipioak nabarmendu ditu Ollok.
“Azken finean, emakumeen giza eskubideak -laburbildu du-, emakumeen giza eskubideetatik abiatzen den lege bat delako”. Guztiak “emakumeen aurkako indarkeriarekin bukatzeko” helburua du, “desberdintasunaren adierazpen gordinena delako”.
Kontseilariaren ahotan, araudiak “administrazio publikoak, konkretuki udalak, eragile erabakigarri eta eraldatzaile bezala osatzen ditu; mugimendu feministaren papera aitortzen du eta emakumeek pairatzen dituzten bazterketa anitzak identifikatzen ditu”.
Olloren esanetan, legeak “gizarte eredu berri bat ezartzea bilatzen du, bizitzaren jasangarritasunari garrantzia eman eta genero estereotipo eta rolak hautsi”, genero arrakalak eta emakumeen parte-hartze sozial eta politikorako zailtasunak ezabatuz.
Arauak 63 artikulu ditu, eta Parlamentuak otsaila bukaeran eztabaidatu dezake.
Nafarroako Berdintasun Kontseilua aholku eta parte-hartze organoa izango da. Bestalde, Nafarroako politika publiko guztietan genero perspektiba aplikatzeko berme izango da INAI.
Foru Gobernuak egindako politika guztietan berdintasun printzipioa bermatzeko mekanismoei dagokionez, Berdintasun Egitasmo Estrategikoa da azpimarragarriena.
Osasun, gizarte-inklusio, esku-hartze komunitario eta garapenerako lankidetzan genero perspektiba barneratzeko saiakera egingo du arauak.
Prozesua “luze, konplexu eta parte-hartze handikoa” izan dela gogorarazi du kontseilariak. Eragile, alderdi politiko, erakunde eta Foru Exekutiboaren 317 ekarpen bildu dituztela azpimarratu du Ollok.
