Ondarroan desagertutako gizonaren bila ari dira berriro

Igandean Ondarroako kai-muturrean arrantzan zegoela desagertu zen gizona bilatzeko lanei ekin diete gaur, asteartea, 08:00etan, Eusko Jaurlaritzaren Segurtasun Sailak jakinarazi duenez.

Lagun batek eman zuen 44 urteko arrasatearraren desagertzearen berri. Igandeko 02:30ean ohartarazi zuenez, elkarrekin arrantzan ari ziren lekura itzuli zenean, gizonaren kanabera bakarrik topatu zuen.

Berehala ekin zion Ertzaintzak gizona topatzeari, urpekarien, helikoptero baten eta Gurutze Gorriko boluntarioen laguntzarekin. Orain arte egindako lanek, baina, ez dute emaitzarik eman.