Donostiako pintxoak, munduko gastronomia-esperientziarik onena, Lonely Planeten ustez

Donostiako pintxoez gozatzea, horixe da Lonely Planet bidaia-giden argitaletxearen iritziz, munduko gastronomia-esperientziarik onena. Bere web orrian, Lonely Planetek, argitaratu du zerrenda bat, non islatzen duen zeintzuk diren, haren ustez, esperientzia gastronomikorik onenak; Lonely Planetek azpimarratzen du bertako produktuek garrantzi handia dutela Gipuzkoako hiriburuko pintxoetan, eta gomendatzen du, gainera, pintxoak egun oso bateko bisitarekin laguntzea.

"Pintxoak Donostian; horixe da kultura baten sukaldaritzan murgiltzeko modurik onena", dio Lonely Planetek; argitaletxeak azaltzen du pintxoei "tapa" deitzen diotela Estatuko hegoaldean, eta honako aholkua ematen du horiek dastatzeko: edateko zerbaitekin laguntzea. "Pintxoek", dio Lonely Planetek, "hainbat modutara ager daitezke: era tradizonala, alegia, jakiak ogiaren gainean, eta interpretazio gastronomiko txikiak bezala ere. Horien zaporeek desafio egingo diote zeuk ikusten duzunari".

"Eredurik apalenak, maiz, harrigarrienak dira: zainzuriekin, tuna- eta antxoa-tartaleta, edo, agian, txanpiñoiak baratxuriarekin". Gidak dio ordurik onena, pintxotan hasteko, 21:00ak direla, eguna Donostian eman ostean, eta siesta eginda: "Minutu batzuk bakarrik beharko dituzu hurrengo tabernara joateko, beste gutizi gozo batzuetaz gozatzeko, jaten eta edaten ari diren beste lagun-talde bat topatzeko; jarraitu horien bidea", gomendatzen du.