Eraikin baten teilatua eraitsi da Donostian, sute baten ondorioz

Sute handia piztu da gaur goizean Donostiako eraikin huts batean, Eusko Jaurlaritzaren Herrizaingo Sailak eta hiriko suhiltzaileek jakitera eman dutenez.

Sua 06:00 aldera piztu da Miracruz kaleko 36.ean, Gros auzoan, eta oso azkar zabaldu da, eraikinaren egitura egurrezkoa delako, baina dagoeneko itzali dute.

Teilatua eraitsi egin da, baina baliteke eraikin osoa behera etorzea.

Odon Elorza Donostiako alkatearen hitzetan, etxe-okupatzaileen harira, "ez dagokio Udalari hutsik dagoen eraikin baten aurrean guardia bat jartzea"; eraikin horretako jabeak "beharrezkoak diren neurriak hartu behar ditu auzokideen segurtasuna bermatzeko", esan du.

Suhiltzaileak eta Udaltzaingoa ikertzen ari dira sutearen nondik norakoak, eta alkateak esan duenez, "zorionez ez da biktimarik izan, soilik kalte materialak izan dira, eta kaltetuenak alboko eraikinekoak izan dira; izan ere, etxetik atera behar izan dituzte", baina laster itzuliko dira, Elorzaren esanetan.

Orain, "fatxadaren egoera da arriskutsuena"; Udaleko hirigintza teknikoak aztertzen ari dira eraikina eraitsi daitekeen.

Sutearen ondorioz, Miracruz kalea moztu behar izan dute goizetik, baina alkateren hitzetan, baliteke bihar zabalik egotea berriro; dena den, ez dute zabalduko "segurtasuna bermatua egon arte, edo fatxada eraitsi arte". Azken aukera horrek makineriaren beharra izango luke eta beraz galtzadan jarriko lukete.

Adif-en arabera, uteak atzerapenak eragin ditu trenbideen trafikoan, baina ez dute moztu behar izanik. Atzerapenak hamar minutu ingurukoak izan dira.

Suaren ondorioz, Renferen aldirietako trenen joan-etorriak eten behar izan dituzte puntu horretan, su hartu duen eraikina trenbidearen ondoan dagoelako. Madrileko noranzkoan tren zerbitzua eten behar izan dute.