Artxibatu egin dute Durangoko bonbardaketagatik aurkeztutako kereila

Durangoko 3. Epaitegiak artxibatu egin du 1937ko bonbardaketagatik Durangoko Udalak eta memoria historikoaren aldeko hainbat kolektibok uztailean aurkeztutako kereila. 1937ko martxoa eta apirila bitartean 46 pilotu italiarrek egin zituzten bonbardaketetan 300 pertsona baino gehiago hil ziren.

Udaleko iturriek iragarri dutenez, salatzaileek erabakiaren aurkako helegitea aurkeztuko dute Bilboko Auzitegi Nagusian.

Udalak eta memoria historikoren aldeko hainbat erakundek 2017ko uztailaren 18an aurkeztu zuten kereila Durangoko epaitegian, bonbardaketan parte hartu zuten 46 pilotu italiarrei gerra krimenak eta gizateriaren aurkako delituak egotzi diezazkieketen argitzeko.

300 pertsona baino gehiago hiltzeaz gain, 321 eraikin suntsitu edo kaltetu ziren bonbardaketa haietan, izua nagusitu zen durangarren artean eta "milaka pertsonak ihes egin zuten".