Zornotzako Udalak salatu egin du adingabe batek pairatutako eraso sexista

Larunbat honetan Zornotzako Karmengo jaietan adin txikiko neska batek jasandako eraso sexista "erabat" errefuxatu du Zornotzako Udalak, aho batez onartutako adierazpen instituzional baten bidez. Gainera, "elkartasuna" erakutsi die biktimari eta familiari, eta "beharko luketen edozertarako" laguntzeko prest agertu da.

Segurtasun Sailak jakinarazi duenez, Ertzaintzak ikerketa abiatu du salaketaren berri izan baino ez, baina oraindik ez du atxiloketarik egin.

Erasoa gaitzesteko asmoz, elkarretaratzea deitu du Udalak igande arratsalderako, Zornotzako Herriko Plazan, eta ehunka zornotzarrek bat egin dute deialdiarekin.

"Herritar guztien parte-hartzea beharrezkoa da edozein eraso sexista salatzeko", nabarmendu du Udalak, eta, "hori dela eta, emakumezkoen aurkako indarkeria ezabatzeko lanean jarraituko dugu, elkarbizitza eta errespetua nagusi diren gizarte parekidea lortzeko".

"Indarkeria sexista ez da alor pribatuko arazo bat, arazo kolektiboa baizik", ondorioztatu du Udalak.

Mugimendu feministaren gaitzespena

Igandean zabaldutako ohar baten bidez, Zornotzako Emakume Taldeak ere gaitzetsi du erasoa. "Mota honetako jarrerarik ez dugu onartuko, ez hemen, ez inon", adierazi du Zornotzako mugimendu feministak.

"Jaiak askatasunez bizi eta gozatu nahi ditugu", azpimarratu du, "horregatik, erasotzaileei aurrean izango gaituztela eta jai-guneetatik kanporatuak izango direla aho betez ohartarazten diegu".

Amaitzeko, datorren larunbatean (hilak 22) genero-indarkeriaren aurkako manifestazioa deitu dute, 00:00etan Zelaieta parkeko kioskotik hasita, eta bertan parte hartzeko gonbidapena egin diete herritar guztiei.

---------------------------------------------

Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan); doakoak dira eta ez dute arrastorik uzten fakturan.