Mexikon desagertutakoen txalupa-zaina eta gidaria, kartzelan

Gerardo Cabrera San Luis Potosi Mexikoko Estatuko Babes Zibileko zuzendariak jakinarazi duenez, hirugarren gorpu bat aurkitu dute lau gazte kataluniar desagertu ziren inguruan, baina ezin izan dute argitu nor den.

Nuria Terradas Trias atzo identifikatutako neskaren gorpua aurkitu zuten lekutik gertu topatu dute hirugarren hilotza. Cabrerak azaldu duenez, gorputza oso egoera txarrean aurkitu dute eta oraindik ezin izan dute argitu gizona ala emakumea den ere.

Francesc Espasa Nolet eta Irene Carbo Xifre dira ibaia gurutzatzen ari zirela izandako istripuaren ondorioz desagertuta jarraitzen dutenak.

Bernat Palau Tomas eta Adina Frau Pascual, berriz, dira onik atera ziren turista kataluniar bakarrak, gainerako lauak desagertu egin baitziren, eta Espainiako enbaxadako iturriek azaldu dutenez, gaur hartuko dute Bartzelonara itzultzeko hegaldia.

Desagertutako nesken senideak atzo iritsi ziren Mexikora eta Nuria Terradasen gorpua identifikatu zuten. Espainiako diplomazia dagoeneko hasi da gorpua Bartzelonara eramateko kudeaketak egiten.

Ontzi-zaina eta gidaria, kartzelatuta

Antonio Casado Espainiak Mexikon duen Enbaxadako lehenengo idazkariak esan du epaileak itsasontziko gidaria eta gida turistikoa galdekatu dituela eta horren ostean kartzelara bidali dituela.

Ustez, gida izan zen ibaia zeharkatzeko gai zirela esan zuena, nahiz eta eguraldi txarragatik turismo arloko agintariek debekatu.

Itsasontzia irauli egin zen eta gazteak ibaira erori ziren. Bi bakarrik iritsi ziren lehorrera, gainerakoak urak eraman zituen.