Errefuxiatuen aldeko martxak, Donostian, Iruñean eta Bilbon

Errefuxiatuen eskubideen aldeko olatua irudikatu nahi da gaur Europa osoan, hainbat gizarte-taldek deituta.  Manifestazioak egingo dira, 12:00etan hasita, Euskal Herrian eta Europako dozenaka hiriburutan;  "Europa sendoa"ren kontrako  protestak izango dira, eta errefuxiatuei "harrera erreala" egitea aldarrikatuko da.

Euskal Herrian, Ongi Etorri Errefuxiatuak plataformak deitu ditu martxak Bilbon , Iruñean eta Donostian, 'Europak, gotorlekuari ez. Harrera orain' lelopean. Mobilizazioen amaieran, manifestu bateratu bat zabalduko dute.

Estatu espainiarrean dozenaka gizarte-mugimenduk, CEAR eta Amnistia Internazionalak gobernuz kanpoko erakundeek bat egin dute deialdiarekin.

Europak errefuxiatuen giza-eskubide oinarrizkoenak ez dituela errespetatzen salatuko dute guztiek, aho batez. Europar Batasuna "edozein oinarri solidarioaren kontrako bidean indartzen eta hazten" ari dela gaineratu dute.