Gizartea -
Nafarroako Ospitale Gunea
Nafarroako Ospitaleko Larrialdietako 'egoera larria' salatu dute
Erizain, erizain laguntzaile eta zaindarien kolektiboak aurreikuspen, baliabide eta antolakuntza falta dagoela adierazi dute.
AGENTZIAK | ERREDAKZIOA
Nafarroako Ospitale Guneko Larrialdietako erizain, erizain laguntzaile eta zaindarien kolektiboak salatu duenez, zerbitzuak ez du behar bezala funtzionatzen, aurreikuspen, baliabide eta antolakuntza falta tarteko. Hori dela eta, egoera "sostengaezina" dela adierazi dute.
Juan Manuel del Moral erizainak eta Sira Garcia zaindariak kolektibo osoaren izenean hitz egin dute gaur kazetarien aurrean. Prentsaurrekoan azaldu dutenez, egoera konpontzetik urrun dago; are gehiago, egoera "egunetik egunera larriagoa da".
"Langileek ez dituzte gehiago jasaten lan-baldintza txarrak, antolakuntza falta eta zerbitzuaren beharrei erantzuten ez dieten nagusiak", esan du Del Moralek.
"Larrialdi zerbitzuak ez du behar bezala funtzionatzen aurreikuspen, baliabide eta antolakuntza falta tarteko", azpimarratu du. Horien ustez, lan egiteko moduan hainbat aldaketa egin dituzte, kasu askotan azalpenik eman gabe eta langileen irizpide orokorraren kontra. Ildo horretan, langileak etsita daude zuzendaritzak beren iradokizunak aintzat hartzen ez dituelako.
Horren esanetan, "borondate falta dago zerbitzuaren arazoak konpontzeko". Besteak beste, horregatik, langile askok alde egin dutela nabarmendu du.
Bestalde, langileen ordezkariak ukatu egin du gripeari lotutako egoera denik, eta iaz eta behin eta berriz errepikatzen den zerbait dela adierazi du. Langileak kontratatu direla aitortuta ere, ez dela nahikoa azpimarratu du. "Ez ditugu diru kostua duten gauzak bakarrik eskatzen, antolaketa eskatzen dugu", zehaztu du.