Gizartea -
Polizia-operazioa
Galdakaoko lokal batean arma gehiago bilatu dituzte
Arma-trafikoaren kontra irekitako polizia-operazioaren baitan dago ostiral honetan egin duten miaketa. Ostegunean bost pertsona atxilotu eta 8.000 arma konfiskatu zituzten.
Agentziak | Erredakzioa
Espainiako Poliziak Galdakaoko (Bizkaia) lokal bat miatu du ostiral honetan, arma-trafikoaren kontra irekitako polizia-operazioaren baitan. Ostegunean bost pertsona atxilotu eta merkatu beltzean saltzeko prest zeuden 8.000 gerra-arma atzeman zituzten. Espainiako Barne Ministerioaren arabera, erabilgarriak ez ziren armak manipulatzen zituzten, erabilgarri bihurtzeko.
Polizia iturriek jakinarazi dutenez, Etxebarriko industrigunean gaizkile-taldeak ezkutatuta zituen arma gehiago bilatu dituzte. Ostegunean Galdakaon atxilotutako gizonezkoa lonja horren jabea izango litzateke.
Halaber, Getxon, Oloten (Girona) eta Liendon (Kantabria) beste lau gizon atxilotu zituzten, gaizkile-talde horren kide zirelakoan.
Getxoko Iturribide kaleko lonja batean, armak manipulatzeko eta erabilgarri bilakatzeko tailer sofistikatu bat atzeman zuten.
Poliziaren esanetan, gaizkile-taldea oso aktiboa zen, eta erabilgarriak ez ziren armak bide legaletik erosten zituzten. Horiek manipulatu ostean, erabilgarri izatea lortzen zuten, eta erakunde kriminalei saltzen zizkieten.
