Gizartea -
Euskal aireportuetan
Hainbat hegaldi bertan behera gelditu dira, behe-lainoagatik
Goizean Loiutik atera behar zuten zazpi hegaldi bertan behera gelditu dira, eta Hondarribiko eta Biarritzeko aireportuek ere lainoaren eraginak jasan dituzte.
EITB.EUS
Behe-lainoak arazoak eragin ditu azken orduotan Euskal Herriko hainbat aireportutan: Loiun, Bizkaian; Hondarribian, Gipuzkoan, eta Biarritzen, Iparraldean. Guztira, hogeiren bat hegalditan izan du eragina.
Loiuko aireportuan, esaterako, Bilbotik atera behar zuten zazpi hegaldi bertan behera gelditu dira behe-lainoaren eraginez. Atera ez diren hegaldi horien helmuga Brusela, Amsterdam, Madril, Paris, Munich eta Santiago ziren.
Iparraldean, Biarritzetik 06:45ean Parisera irten behar zuen hegaldia Pauera bideratu dute, eta jendea autobusez ari dira hara eramaten.
Bestalde, hiru hegaldi Iruñera desbideratu dituzte Hondarribiko aireportuan, eta Madrilera eta Bartzelonara zihoazenak, ostera, ez dira atera.
Hala ere, behe-lainoa pixkanaka altxatu da eta, goizeko lehen orduko arazoak gaindituta, aireportuak normaltasunez ari dira lanean.
