Irmoa da Koldo Losada aktorearen senarrari ezarritako kartzela-zigorra

Euskal Autonomia Erkidegoko Justizia Auzitegi Nagusiak berretsi egin du Jon Andoni Ezkurdiari ezarritako 19 urteko kartzela-zigorra. Ezkurdiak bere bikotekidea zen Koldo Losada aktorea hil zuen Bilbon, 2014ko azaroan.

Auzitegi Nagusiak emandako epaia irmoa da, Fiskaltzak bere garaian aurkeztutako apelazio-errekurtsoa erretiratzea erabaki duelako.

Koldo Losadaren hilketa argitzeko epaiketa otsailaren 15a eta 23a bitartean egin zen. Herri-epaimahaiak hilketaren errudun jo zuen haren bikotekidea, eta Bizkaiko Auzitegiak 19 urteko espetxe-zigorra eta erabateko gaitasungabetzea ezarri zizkion, hilketaren errudun jota eta biktimaren senarra izatea larrigarri gisa hartuta.

Gainera, 29 urtean Koldo Losadaren amarengana eta hiru anai-arrebengana hurbiltzeko eta haiekin komunikatzeko debekua ezarri zion, eta, horrez gain, biktimaren anai-arreba bakoitzari 25.000 euroko kalte-ordaina eman beharra ezarri zion.