Alerta laranja Araban, baso-suteak izateko arrisku 'oso altua' baitago

Eusko Jaurlaritzako Segurtasun Sailak alerta laranja ezarri du Araban gaur, asteartean, baso-suteak izateko arriskua 'oso altua' baita. Bizkaian eta Gipuzkoan txikiagoa da arriskua, eta hori dela eta, abisu horia ezarri dute.

Ohar batean, espero diren muturreko fenomeno meteorologikoen berri eman du Larrialdiei Aurre Egiteko eta Meteorologiako Zuzendaritzak. Araban baso-suteak izateko arriskua da denetan kezkagarriena. Astearterako iragarrita dauden tenperatura altuak direla eta, eta hegoaldeko haizea dabilenez eta hezetasun erlatiboa baxua denez, suteak pizteko arriskua "oso altua" da. Hori horrela, alerta laranja ezarri du Arabako lurraldean. Alerta asteleheneko 00:00etatik astearteko 14:00etara egongo da indarrean. Bizkaian eta Gipuzkoan, berriz, suteak izateko arrisku “altua” izango da. Hori dela eta, abisu horia ezarri du.

Enbata eta prezipitazio handiak

Suteengatik ezarritako alerta eta abisuaz gain, astearterako beste bi abisu ezarri dituzte. Izan ere, Euskalmetek egindako iragarpenaren arabera, astearte eguerdian fronte hotz bat sartuko da mendebaldetik, eta eguraldia guztiz aldatuko da: haizeak mendebal/ipar-mendebaldera egingo du, eta zakartu egingo da, tenperaturak behera egingo du, eta euritara joko du.

Hala, Segurtasun Sailak abisu horia ezarri du itsasaldeko arriskua dela eta. Kostaldean, enbata izan daiteke 14:00etatik 20:00etara. Hala, bat-batean eta zakar, haizeak ipar-mendebaldera egingo du, eta bolada gogorrak izango dira, 50-80 km/h-koak.

Halaber, 14:00etan hasita, prezipitazio handiak izan daitezke. Zaparradak botako ditu, zenbait lekutan handiak eta trumoitsuak, bereziki isurialde atlantikoan.