Tren zirkulazioa martxan da Porriñon, bagoiak kendu eta gero

Vigo-Porto linearen zirkulazioa gaur, larunbata, arratsaldean berriz abian ipini dute, atzo Porriño (Pontevedra) inguruan izandako istripuaren ostean. Lau pertsona hil eta 47 zauritu ziren ezbeharraren ondorioz.

Goizaldeko 02:10ean hasi dituzte bagoiak trenbidetik kentzeko lanak, agintari judizialek baimena eman dutenean. Orduz gero lanean aritu dira bidea libre utzi eta errileratzea errekuperatzeko. Gaur goizeko 06:00etan lehen bagoia kentzea lortu eta bi plataformaren gainean ipini dute.

Aurreko zatia olana urdin batekin estali eta plataforma baten gainean jarri dute; bagoiak, berriz, 15 metro atzerago daude, trenbidean ipinita. Epaile batek erabaki beharko du orain noiz kendu hortik.

Istripua atzo, ostirala, gertatu zen, Louredo Valos eta Porriño artean dagoen bigarren desbideratzean, 09:25ean. Ibilbide luzeko 420 trena bidetik irten zen Vigo eta Valença de Miño (Portugal) herrien artean. Arrazoiak ikertzen ari dira orain.