Luizi 'arrisku handia' dagoela ohartarazi dute geologoek

Euskadiko Geologoen Elkargo Ofizialak ohartarazi du luizi "arrisku handia" dagoela, azken egunetan izandako euriteen ondorioz.

Agiri batean, elkargoak azaldu du EAEko azaleraren erdiak % 15eko edo gehiagoko maldak dituela, baita Bilboko eta Donostiako hiriguneetan ere.

Horregatik, etxebizitzatik berehala alde egitea eskatu die herritarrei, baldin eta karraskarik edo kraskarik entzuten badute, bat-batean arrailik agertzen bada, edota ateak eta leihoak markoetan ondo sartzen ez badira.

Gainera, geologoek gogorarazi dute aseguru-etxeek eta aseguru partzuergoak ez dituztela ordaintzen lur-jausiek eragindako kalte materialak.

Atzo, 84 familia etxetik atera behar izan zituzten Ondarroan (Bizkaia), luizi bat dela eta. Gutxienez, 15 egun eman beharko dituzte kanpoan.